பாலியல் தொடர்பை மறைக்க நடிகைக்கு பணம் கொடுத்ததாக கூறப்படும் வழக்கில் அமெரிக்க முன்னாள் அதிபர் ட்ரம்ப் கைதாகக் கூடும் என்பதால் அந்நாட்டின் முக்கிய நகரங்களில் போலீசார் உச்சக்கட்ட உஷார் நிலையில் வைக்கப்பட்டுள்ளனர்.
நியூயார்க், வாஷிங்டன், லாஸ் ஏஞ்சலீஸ் உள்ளிட்ட முக்கிய நகரங்களில் பாதுகாப்பு பலமடங்கு அதிகரிக்கப்பட்டுள்ளது.
ஆபாசப்பட நடிகையுடனான தொடர்பை மறைக்க, பெரும்பணம் கொடுத்து அவரை மௌனமாக்கியதாக கூறப்படும் புகாரின் பேரில் ட்ரம்ப் மீது மன்ஹாட்டன் அரசு வழக்கறிஞர் கிரிமினல் வழக்குப் பதிவு செய்வார் என்று எதிர்பார்க்கப்படுகிறது.
அவ்வாறு நடந்தால், அமெரிக்காவின் முன்னாள் அதிபர் ஒருவருக்கு எதிராக குற்றவியல் வழக்குப்பதிவு செய்யப்படுவது முதன் முறையாக இருக்கும்.
மன்ஹாட்டன் குற்றவியல் நீதிமன்றத்திற்கு வெளியே இரும்புத் தடுப்புகள் வைக்கப்பட்டுள்ளன. அங்கேதான், இவ்வாரம் ட்ரம்ப் மீதான குற்றச்சாட்டுகள் பதிவு செய்யப்படும், கைரேகைகள் பெறப்படும், புகைப்படங்களும் எடுக்கப்படும் என்று அமெரிக்க ஊடகங்கள் கூறுகின்றன.
நியூயார்க் நகரில் உள்ள ட்ரம்ப் டவர் கட்டடத்திற்கு வெளியேயும் பாதுகாப்பு அதிகரிக்கப்பட்டுள்ளது.
நியூயார்க் காவல்துறையின் புலனாய்வு அதிகாரிகள் உள்ளிட்ட அனைத்து காவலர்களும் முழு சீருடை அணிந்து பணியில் இருக்கவும், காவல்துறையின் ஒவ்வொரு அங்கத்தினரும் பாதுகாப்புப் பணியில் ஈடுபடுத்தப்பட்டுள்ளதாகவும் காவல்துறை வட்டாரங்கள் கூறுவதாக பிபிசியின் அமெரிக்கக் கூட்டாளியான சி.பி.எஸ். தெரிவித்துள்ளது.
